Сурет: Коллажды жасаған Зауреш СМАҒҰЛ, «EQ»
Ішкі істер министрлігінде адам саудасына қарсы іс-қимыл жөніндегі ведомствоаралық комиссияның кезекті отырысы өтті. Жиынға мемлекеттік органдардың, жергілікті атқарушы билік өкілдерінің, сондай-ақ Халықаралық көші-қон ұйымы, ЕҚЫҰ бағдарламалар офисі және үкіметтік емес ұйымдардың өкілдері қатысты, деп хабарлайды Zhaiyqmedia.kz ақпарат агенттігі.
Отырыста адам саудасының алдын алу, қылмыстарды анықтау және зардап шеккен азаматтарға көмек көрсету мәселелері талқыланды. Сонымен қатар Қазақстан азаматтарының шетелдегі құқықтарын қорғау, жастар арасында профилактикалық жұмысты күшейту және бұқаралық ақпарат құралдары мен әлеуметтік желілердегі түсіндіру жұмыстарын жетілдіру мәселелеріне ерекше назар аударылды.
Ішкі істер министрлігі адам саудасына қарсы күрес бағытында атқарылып жатқан жұмыстар туралы есеп берді. Ведомствоның мәліметінше, қазіргі таңда Қазақстан Республикасының Қылмыстық кодексінде қанаудың барлық түрлері үшін жауапкершілік қарастырылған. Жыл басынан бері елімізде адам саудасына байланысты 72 қылмыс тіркелген.
Министрлік өкілдері соңғы уақытта адам саудасының дәстүрлі түрлерімен қатар, азаматтарды кибералаяқтыққа, есірткі тасымалына, ұрлыққа, заңсыз көші-қонға және басқа да қылмыстық әрекеттерге тарту жағдайларының көбейіп келе жатқанын атап өтті.
