Сурет: shutterstock.com
Мемлекет басшысы Қасым-Жомарт Тоқаев медицина қызметкерлеріне күш көрсеткен адамдарды қылмыстық жауапкершілікке тарту туралы пікір білдірді, деп хабарлайды Zhaiyqmedia.kz ақпарат агенттігі.
Бүгін Ақордада медицина қызметкерлері күніне орай өткен салтанатты жиында Президент дәрігерлердің қауіпсіздігін қамтамасыз ету мәселесіне тоқталды. Қазіргі уақытта денсаулық сақтау саласында 280 мыңнан астам маман жұмыс істейді.
«Олардың мәртебесін көтеру және беделін күшейту еліміз үшін басымдыққа ие міндет болып қала береді», деді Мемлекет басшысы.
Президент жаңа Конституцияда ұлт саулығы ұғымына алғаш рет кең ауқымда назар аударылғанын атап өтті. Сондай-ақ ол дәрігерлердің қауіпсіздігін қатаң қадағалау жұмысы айрықша назарда болуға тиіс екенін айтып, былтыр кәсіби мереке қарсаңында өткен жиында осы мәселеге арнайы тоқталғанын еске салды.
«Сол себепті мен осы жылдың басында медицина қызметкерлеріне күш көрсеткен адамдарды қылмыстық жауапкершілікке тарту туралы заңға қол қойдым. Бұл шешім қоғамымызда берік орнығып жатқан Заң мен тәртіп қағидатына толық сай келеді», деді Мемлекет басшысы.
