Сурет: Egemen Qazaqstan
Татарстан тұрғыны өз қолымен жасаған ұшақ алғашқы сынақ ұшуы кезінде апатқа ұшырады. Салдарынан ұшқыш оқиға орнында көз жұмды, деп хабарлайды Zhaiyqmedia.kz ақпарат агенттігі.
Қайғылы оқиға Қазан қаласы маңындағы Арск ауданы, Қазанбаш ауылының жанында болған. Татарстан бойынша Ресей ТЖМ Бас басқармасының мәліметінше, қолдан жасалған жеңіл моторлы ұшақ құлаған. Ұшақты басқарған пилот оқиға орнында қаза тапқан.
Ведомство дерегінше, марқұм 57 жаста болған. Ол авиация әуесқойы ретінде ұшақты өз бетінше жобалап, құрастырған.
Қазір апаттың нақты себептері анықталып жатыр. Оқиғаға байланысты Татарстан көлік прокуратурасы тексеру жұмыстарын бастаған.
РЕН ТВ мәліметінше, апатқа ұшыраған әуе кемесі ресми тіркеуден өтпеген. Жеңіл моторлы ұшақ Қазанбаш ауылындағы шағын жеке аэродромда құрастырылған. Ұшақты тіркеу үшін жақын күндері арнайы комиссия келуі тиіс болған. Алайда оның келуін күтпеген әуе кемесінің авторы рұқсатсыз ұшуға шыққан. Соның салдары қайғылы оқиғаға әкеп соқтырған.
