Ауыл шаруашылығы вице-министрі Азат Сұлтанов жақында үйінің жанындағы дүкеннен бір келі қиярды 2300 теңгеге сатып алғанын мойындады, деп хабарлайды Zhaiyqmedia ақпарат агенттігі.
«Қыста көкөніс бағасының шарықтауына жылыжайлардың жарық пен жылуға кететін шығындары және делдалдардың қосатын үстеме бағасы себеп болады», – деп түсіндірді Сұлтанов.
Министрлік бағаны тұрақтандыру үшін бірнеше шараны қолға алмақ. Біріншіден, ведомство сауда желілерінің өнімді алыпсатарларсыз, тікелей фермерлерден сатып алуы үшін «айналым схемасын» енгізіп жатыр.
Екіншіден, өңірлерді жеңілдікпен қаржыландыруға арналған маусымдық өнімдер тізімі кеңейтілмек.
Сондай-ақ ірі сауда желілеріндегі бағаға мониторинг күшейтіліп, негізсіз үстеме қосқандарға салынатын айыппұл қатаңдатылады. Алайда вице-министр «үй жанындағы дүкендерді» бақылау қиынырақ екенін, сондықтан негізгі назар халық көп баратын ірі сауда орындарына аударылатынын атап өтті.
Фото: Әлеуметтік желіден
