Сурет: Egemen Qazaqstan
Мәскеуде 81 жасқа қараған шағында танымал футбол маманы Владимир Гулямхайдаров өмірден озды. Бұл қайғылы хабарды Қазақстан футбол федерациясы жеткізді, деп хабарлайды Zhaiyqmedia.kz ақпарат агенттігі.
Бапкердің қазасы туралы мәлімет 15 маусымда жарияланды. Қазіргі уақытта өлімнің себебі айтылмады.
Владимир Гулямхайдаров Тәжікстанда туып, футболшы ретіндегі карьерасының көп бөлігін сол елде өткізген. 1996-2012 жылдар аралығында Қазақстан футболында жемісті еңбек етіп, бірнеше клубта әртүрлі қызмет атқарды.
Ол алматылық «Қайраттан» бөлек, «Локомотив Астана», «Тараз», «Мегаспорт» және «Сұңқар» командаларында жұмыс істеген.
Қазақстан футбол федерациясының дерегінше, Владимир Әлішұлы 1999 және 2001 жылдары Қазақстан кубогін жеңіп алған. 2004 жылы алматылық «Қайраттың» бапкерлер штабында қызмет етіп жүріп, Қазақстан Премьер-лигасының чемпионы атанған.
Марқұмның қазасы Қазақстан футболы үшін үлкен қайғы. Ол елдегі футболдың дамуына зор үлес қосып, көптеген ойыншылар мен мамандардың қалыптасуына ықпал етті.
