Тұрлыхановтың ұлының жазасын жеңілдету туралы өтініші қанағаттандырылмады,-деп хабарлайды Жайықмедиа.кз.
Алматы облысы Алатау қаласының соты 4 қыркүйекте сотталған Нұрасыл Болаттың өтінішін қарады. Ол жазаның өтелмеген бөлігін жеңіл жазаға ауыстыруды сұраған еді.
Еске салсақ, 2024 жылғы 22 қазанда Алматы қаласы Медеу ауданы №2 соты Нұрасыл Болатқа қатысты қабылдаған шешімде бастапқыда берілген 1 жыл 5 ай 10 күн бас бостандығын шектеу жазасы пробация талаптарын бірнеше рет бұзғаны үшін орташа қауіпсіздік мекемесінде бас бостандығынан айыруға ауыстырылған болатын.
Сот құжаттарына сәйкес, ол бірнеше мәрте тыйымды бұзған:
- 2024 жылғы 14 тамызда түнгі уақытта қоғамдық орында жүрген;
- 11 қазанда мейрамханаға барған;
- 12 қазанда ойын-сауық мекемесінде болған.
Сотталған азаматқа бұл шектеулер алдын ала түсіндірілгенімен, талаптарды сақтамағаны дәлелденді.
Осыған байланысты судья Нұрасыл Болаттың жазасын жеңілдету туралы өтінішін қабылдамай, қаулыны өзгеріссіз қалдырды.
