Денсаулық сақтау министрлігі 14-17 жастағы мектеп оқушыларына адам папиломасы вирусына (ВПЧ) қарсы қосымша вакцинация басталатынын мәлімдеді, деп хабарлайды Zhaiyqmedia.kz ақпарат агенттігі.
Екпе тек қыздарға арналған және толығымен тегін. Вакцинация ерікті негізде жүргізіледі, ата-аналардың келісімі қажет.
Министрліктің айтуынша, бұл шара жатыр мойны обырының алдын алуға бағытталған. Өйткені ВПЧ – осы дерттің негізгі себебі.
«Біз жыл сайын 700-ге жуық әйелдің жатыр мойны обырынан көз жұматынын ескерсек, вакцинация өмірді сақтап қалудың тиімді тәсілі. Екпе алған қыздардың кейінгі өмірінде қатерлі ісікке шалдығу қаупі 90%-ға азаяды», – деді Денсаулық сақтау министрлігінің ресми өкілі.
Айта кетейік, бұған дейін де 11-13 жастағы қыздарға ВПЧ вакцинасы егіліп келген. Ал енді жасөспірімдердің егде тобы да қамтылады.
Екпе алу үшін ата-аналар емханаға немесе мектептегі медициналық пунктке хабарласуы керек. Дәрігерлер алдын ала тексеруден өткізіп, қарсы көрсетілімдерді анықтайды.
