«ҚазМұнайГаз» ұлттық компаниясы Каспий құбыр консорциумының терминалы маңында қазақстандық мұнай таситын танкерге дрон шабуылы жасалғанын растады. Бұл кемені ҚМГ-ның еншілес компаниясы жалдағаны белгілі болды, деп хабарлайды Zhaiyqmedia ақпарат агенттігі.
Шабуылға ұшыраған MATILDA танкерін «ҚазМұнайГаздың» еншілес компаниясы – «Қазтеңізкөлікфлоты» жалдаған. 13 қаңтарда танкерге ұшқышсыз ұшу аппаратымен шабуыл жасалып, салдарынан жарылыс болған. Алайда, артынан өрт шыққан жоқ.
«Экипаж мүшелерінің ешқайсысы зардап шеккен жоқ. Алдын ала бағалау бойынша, кеме жүзуге жарамды, бастапқы тексеру кезінде күрделі құрылымдық зақым белгілері анықталмады. Қазір келтірілген шығын көлемі бағаланып жатыр», – делінген «ҚазМұнайГаз» таратқан хабарламада.
