Сурет: Egemen Qazaqstan
Елорда мәслихаты тұрғын үйді жаңғырту бағдарламасын бекітті. Қала халқы санының қарқынды өсуі бағдарламаны қабылдауға себеп болды. Болжам бойынша, 2035 жылға қарай Астана тұрғындарының саны 2,3 миллион адамға жетеді, деп хабарлайды Zhaiyqmedia.kz ақпарат агенттігі.
Апатты үйлерді көшіру кестесі бойынша, апатты тұрғын үйлердің иелеріне көлемі жағынан тең тұрғын үй беріледі. Бұл кемінде бір бөлмелі пәтерден кем болмауы тиіс. Тұрғын емес нысандардың меншік иелеріне баламалы аумақ ұсынылады немесе олардың мүлкінің нарықтық құны өтеледі.
Бағдарлама барысында қала билігі Анкара қаласының тәжірибесіне негізделген үлгіні қолданбақ. Бұл модельде салынған тұрғын үйлердің бір бөлігі қоныс аударушыларға беріліп, қалғаны нарықта сатылады. Астанада апатты үйлерден 4 200 адам көшіріледі.
Жобаны қаржыландыру жергілікті бюджет, мемлекеттік-жекеменшік әріптестік тетіктері, қарыз қаражаты, мемлекеттік бағалы қағаздар және тұрғын үй сатудан түсетін табыс есебінен жүзеге асырылады.
