Сурет: Egemen Qazaqstan
Алматы әуежайында құрылыс жұмыстары кезінде жолаушылардың маңына биіктен ажырап кеткен құбырлар құлаған. Оқиға куәгерлерінің айтуынша, конструкциялар адамдардың, оның ішінде балалар мен қарттардың жанына түскен, деп хабарлайды Zhaiyqmedia.kz ақпарат агенттігі.
Куәгерлердің бірі оқиғаның өте жылдам болғанын айтып, жолаушылардың дер кезінде әрекет етуге үлгермеуі мүмкін екенін жеткізді.
Әуежай әкімшілігінің мәліметінше, инженерлік жүйелерді монтаждау кезінде икемді желдету құбыры түсіріліп жатқан сәтте ажырап кеткен. Алайда конструкция сақтандыру арқандарына ілініп қалғандықтан, зардап шеккендер жоқ.
Әкімшілік барлық элементтердің дереу бөлшектелгенін және қосымша қауіпсіздік шаралары қабылданғанын хабарлады. Аталған жұмыстар әуежайды жоспарлы жаңғырту аясында жүргізіліп жатқан.
