ОПЕК+ альянсы мұнай өндіру көлемін тағы да арттыруға келісті. Бұл жолы квотаны көтеруге Қазақстанды қосқанда жеті мемлекет қолдау білдірді, деп хабарлайды Zhaiyqmedia.kz ақпарат агенттігі.
Келісім бойынша, мамыр айынан бастап альянс күніне 411 мың баррельге көбірек мұнай өндіретін болады. Бұл шешім нарықты тұрақтандыру және бағаны ұстап тұру үшін қабылданды.
«Біз нарықтағы тепе-теңдікті сақтау үшін квоталарды біртіндеп арттыруды жалғастырамыз. Бұл қадам барлық қатысушылардың мүддесін ескереді», — делінген ОПЕК+ коммюникесінде.
Қазақстан үшін нақты квота мөлшері әлі жарияланған жоқ. Бірақ сарапшылардың болжамынша, еліміздің тәуліктік өндірісі 1,5 миллион баррельден асады. Бұл — мұнай нарығындағы ең ірі ойыншылардың бірі екенімізді көрсетеді.
Айта кетейік, бұған дейін ОПЕК+ мүшелері өндіруді шектеу саясатын ұстанып келген еді. Ендігі кезектегі арттыру сәуір айының соңында тағы да талқыланады.
