29 шілде күні Алматыдағы Макан Есболатов атындағы Ішкі істер министрлігі академиясында бір топ ата-ана наразылық білдіріп, мекеме алдында жанжал шығарды. Себеп – балалары жоғары балл жинаса да, грантқа түсе алмаған. Ата-аналардың айтуынша, академия өкілдері оқуға түсе алмағандарға Петропавлдағы Ұлттық ұлан институтына немесе Ресейдің Воронеж қаласындағы оқу орнына баруды ұсынған, деп жазады Orda.kz.
75 баллмен түсе алмай, 54 баллмен түскендер бар
Наразы топтың ішінде «Жас Ұлан» мектебі мен «Арыстан» лицейінің түлектерінің ата-аналары да бар. Бұл оқу орындары ІІМ академиясына түсуге арнайы дайындық жүргізетін білім ошақтары саналады. Бірақ академияда тек грант негізінде ғана оқуға болады, ақылы бөлім жоқ. Сол себепті ата-аналар гранттың әділ бөлінбегенін айтып отыр.
Мысалы, Жанар Мырқасымованың айтуынша, баласы медициналық тексерістен, физикалық сынақтан сәтті өтіп, ҰБТ-дан 75 балл жинаған. Алайда оқуға түсе алмаған. «Кейбіреулер 52–54 балмен түсті. Ақылы бөлім ашылса, өзіміз төлер едік. Бірақ ондай мүмкіндік те жоқ», — дейді ол.
Тағы бір ата-ана Асхат Шәріповтің айтуынша, баласына психологиялық тексеруден өтпеді деген желеумен бас тарту құжатына қол қойдыртқан. «18 жасқа толған балам неге бас тарту хатына қол қояды? Бұл — қысым. Көптеген мықты бала грантсыз қалды, ал ақша мен байланысы барлар ғана өтті. Академияға тексеру жүргізілсін!» — дейді ол.
Бір қыз өз-өзіне қол салмақ болған – бірақ академия растамады
Ата-аналар айтуынша, өткен аптада оқуға түсе алмаған бір қыз академия аумағында өз-өзіне қол жұмсамақ болған. Қызды құтқарып қалғаннан кейін оны грантқа қабылдаған. Алайда Алматы қалалық Полиция департаменті мен академия басшылығы бұл деректі жоққа шығарды.
Академия не дейді?
Академия басшысының орынбасары Ержан Бимолданов биыл талапкерлер санының тым көп екенін айтты. «700 бала құжат тапсырды, ал академия 300 орынға ғана есептелген. Порог балл – 50. Бірақ бәсекелестік жоғары. Мәселен, 70-тен жоғары балл жинағандар да түсе алмауы мүмкін. Дегенмен барлық үміткер комиссиядан өтті. Қабылдау процесі бейнебақылауға жазылды, әділ өтті», — деді ол.
Оның айтуынша, 54–56 балл жинап түскендер бар, бірақ олар — жеңілдік санатына кіретіндер: Ұлттық ұланда қызмет еткендер, спорт шеберлері, 100 баллдан жоғары жинағандар немесе қызметтік міндетін атқару кезінде қаза тапқан полицейлердің балалары.
Неге Ресейге баруға кеңес береді?
Бимолданов Қазақстан мен Ресей арасында ІІМ оқу орындары бойынша келісім бар екенін айтты. «Мәселен, Воронежде, Екатеринбургте, Мәскеуде ІІМ оқу орындары бар. Ол жерге түсу үшін емтихан тапсыру қажет емес, Қазақстандағы ҰБТ баллы жеткілікті. Биыл бізден 7 үміткер сұралды. Біз ата-аналарға соны ұсындық. Сондай-ақ Петропавлдағы әскери институтта бос орын бар екенін де ескерттік. Немесе басқа ЖОО-да бір семестр оқып, кейін академияға қайта грантқа түсуге болады — кейде студенттер тәртіп не үлгерім бойынша оқудан шығып қалады», — деді ол.
