Алғашында облыстық, кейін республикалық деңгейде үш жыл қатарынан ұйымдастырылған фестиваль осы жылы Ресей Федерациясының Самара, Саратов және Орынбор қалаларынан келген шеберлердің қатысуымен шекарадан асып, халықаралық мәртебеге ие болды.
Фестиваль кең ауқымда ұйымдастырылып, қала тұрғындары мен қонақтары үшін үлкен мерекеге айналды. Қазақ халқының дәстүрлі қолөнері мен ұлттық бұйымдарына арналған шарада Батыс Қазақстан, Атырау, Ақтөбе облыстарынан және Ресей Федерациясынан келген 130-дан астам қолөнер шеберлері бас қосты.
Этнофестиваль аясында түрлі шеберлік сағаттары мен көне қолөнер техникасының көрсетілімдері ұйымдастырылды.
Қолдан жасалған бұйымдар жәрмеңкесі, фольклорлық ансамбльдердің өнері, ұлттық спорт түрлерінен жарыстар – барлығы ата-баба мұрасын дәріптеу мен ұлттық құндылықтарды насихаттауға бағытталған.
Фестиваль шеңберінде ұсынылған бұйымдар бірегейлігімен, сапасымен және қолжетімді бағаларымен де ерекшеленді. Бұл – тек мереке ғана емес, сонымен қатар, шеберлер еңбегін қолдау мен ұлттық мұраны ұлықтауға бағытталған маңызды мәдени оқиға.
БҚО әкімінің баспасөз қызметі
