Батыс Қазақстан облысының Янайкин ауылындағы №177 референдум учаскесінде ерекше оқиға болды: ауылдың белсенді ақ жаулықты әжелері мен тату келіндері бір уақытта келіп, өз таңдауын жасады. Бұл – жай ғана азаматтық борышты өтеу емес, ұрпақтар сабақтастығы мен ауыл бірлігінің жарқын үлгісі, деп хабарлайды Zhaiyqmedia ақпарат агенттігі.
Ауылдың қоғамдық өміріне үнемі белсене араласатын аналар бұл жолы да ынтымақтың үлгісін көрсетті. Олардың сайлау учаскесіне топ болып келуі – елдің тыныштығы мен болашақ ұрпақтың қамына деген аналық жауапкершілікті білдіреді.
«Аналардың таңдауы – ұрпақтың болашағы. Елдің тілеуін тілеп отыратын аналардың бұл қадамы жас буынға үлкен өнеге», – деді кейуаналардың бірі.
«Береке – бірлікте» демекші, аналардың ел тағдырына бей-жай қарамай, бірлікпен келіп дауыс беруі ауыл жастарына да үлгі болды. Бұл оқиға ұрпақ сабақтастығы мен ел болашағына деген ортақ жауапкершіліктің маңызын айшықтай түсті.
Фото: Әлеуметтік желіден
