2025 жылы арнаулы салық режимін пайдаланған жеке кәсіпкерлер үшін 2026 жылы қызметті тоқтату жолы нақтыланды. Процедура үш негізгі кезеңнен тұрады — декларация тапсыру, салықтық хабарлама жіберу және қызметті ресми тоқтату.
Бұл ереже АСР (оңайлатылған декларация, бөлшек салық, тіркелген шегерім) қолданған кәсіпкерлерге қатысты. Өз қызметін тоқтатқысы келетіндер 2026 жылдың 1 қаңтарынан 28 ақпанына дейін тиісті әрекеттерді орындауы тиіс.
Бұл туралы Zhaiyqmedia ақпарат агенттігі хабарлайды.
ЖК жабуды неден бастау керек?
Ең алдымен, салық есептілігін тапсыру қажет. Бұл 2025 жылдың 4-тоқсаны немесе бірінші жартыжылдығына арналған декларация болуы мүмкін. Құжатқа «Кезекті» деген белгі қойылады.
Келесі қадам — салық режимін өзгерту туралы хабарлама беру. Хабарламада жаңа режимді таңдау қажет: не «Оңайлатылған декларация негізінде АСР», не «Жалпыға бірдей белгіленген тәртіп». Себеп ретінде «Ерікті түрде шешім қабылдау» көрсетіледі. Таңдалған режим 2026 жылдың 1 қаңтарынан бастап күшіне енеді.
Қызметті тоқтату үшін не істеу керек?
ЖК жабу үшін соңғы қадам — қызметті тоқтату туралы өтініш беру. Бұл үшін кәсіпкер тиісті салық есептілігін де алдын ала тапсыруы керек.
АСР қолданғандар 2026 жылдың бірінші жартыжылдығына арналған 910.00 нұсқасын тапсырады, ал жалпы тәртіпке өткендер — бірінші тоқсан бойынша есеп береді. Қажет болған жағдайда қосымша құжаттарды да өткізуге тура келеді.
Маңызды ескерту: егер салық режимін өзгерту туралы хабарлама уақытында тапсырылмаса, қызметті тоқтату өтініші қабылданбайды. Яғни, алдымен хабарламаны өткізу — міндетті шарт.
