Ресейлік кәсіпкер Шалва Чигиринскийдің айтуынша, Қазақстанның бұрынғы президенті Нұрсұлтан Назарбаевтың жақын адамдары Францияның Лазур жағалауынан жарты миллиард долларға дейін ақша жұмсап, жазғы резиденция сатып алмақ болған.
Чигиринскийдің сөзінше, ол әйгілі вилланы кезінде африкалық диктатордан 7 млрд 858 млн теңгеге сатып алған. Алайда көп ұзамай Назарбаевтың өкілдері келіп, әлдеқайда қымбат баға ұсыныпты.
> «Назарбаевтың адамдары үйді алу үшін маған жарты миллиард долларға дейін бермек болды. Олар Францияның оңтүстігінен кең жазғы резиденция іздеді. Тікұшақ қонатын алаң, екі бассейн, бірнеше қонақ қабылдайтын бөлмелер болуы шарт еді», – дейді кәсіпкер.
Аталған вилланың аумағы – 3,2 гектар. Үйдің ішінде 15 жатын бөлме, екі бассейн бар. Сондай-ақ жеке тікұшақ алаңы және сегіз автокөлікке арналған тұрақ қарастырылған. Қазіргі уақытта қымбат жылжымайтын мүлік жалға беріліп жатыр.
Бұл дерек Назарбаев әулетінің шетелдегі ықтимал байлығы мен жылжымайтын мүлікке қатысты жаңа сұрақтарды туындатуда.
