Ақтөбе облысында жастар арасындағы жаппай төбелес қайғылы аяқталып, бір адам қаза тапты. Полиция департаменті жанжалға қатысқандардың барлығы анықталып, ұсталғанын мәлімдеді, деп хабарлайды Zhaiyqmedia ақпарат агенттігі.
Облыстық полиция департаментінің хабарлауынша, аталған факті бойынша қылмыстық іс қозғалған. Оқиғаға қатысты барлық адам анықталып, полиция бөліміне жеткізілген.
«Тергеу барысы полиция департаменті бастығының бақылауында. Кінәлі тұлғалар заңда белгіленген тәртіппен жауапқа тартылады», — деп хабарлады ведомствоның баспасөз қызметі.
Жергілікті «Диапазон» басылымының жазуынша, қаза тапқан жасөспірім небәрі 17 жаста болған. Сондай-ақ ұсталғандардың барлығы да кәмелетке толмағандар екені айтылады.
Бұған дейін әлеуметтік желіде жаппай төбелес кезінде қару қолданылғаны туралы ақпарат тараған еді. Алайда полиция бұл дерекке қатысты әзірге түсініктеме бермеді.
Фото: Әлеуметтік желіден
