Илон Масктың X платформасы Grok жасанды интеллектісіне шынайы адамдардың суретін өңдеп, оларды ашық-шашық киіммен көрсетуге тыйым салды, деп хабарлайды Zhaiyqmedia ақпарат агенттігі.
«Біз Grok-тың шынайы адамдардың суретін өңдеп, оларды бикини сияқты ашық киімде көрсетуіне жол бермеу үшін шара қабылдадық. Бұл шектеу ақылы жазылушыларды қоса алғанда, барлық қолданушыға қатысты», — делінген Х платформасының хабарламасында.
Бұл шешім Калифорния бас прокурорының мәлімдемесінен кейін бірнеше сағаттан соң қабылданған. Прокурор биліктің осы модель арқылы жасалған, арасында балалардың да суреті бар сексуалды сипаттағы дипфейктердің таралуын тексеріп жатқанын айтқан еді.
Бұған дейін Илон Маск Х платформасын сынаушыларды «сөз бостандығын тұншықтырғысы келеді» деп айыптап, өз сөзін Ұлыбритания премьер-министрі Кир Стармердің бикини киген екі жасанды суретімен дәлелдеген болатын.
