Жетісу футбол клубының бас бапкері Самат Смақов жас шабуылшы Шерхан Тұрдалиевке қатысты пікір білдіріп, оған артық назар мен мақтаудың қажеті жоқ екенін айтты.

> “Шерхан әлі өте жас. Мысалы, Еркебұлан Сейдахмет “Уфаға” ауысқан кезде бәрі оны “тұншықтырып” жіберді: “Еркебұлан дәретханаға барды”, “Еркебұлан Coca-Cola сатып алды”, “Еркебұлан мынаны істеді” деген сияқты жаңалықтар толып кетті. Соңында таланттан айырылдық,” – деді Смақов.

Бапкердің айтуынша, дәл осындай шамадан тыс ақпараттық қысым жас ойыншылардың психологиясына теріс әсер етіп, олардың дамуын баяулатуы мүмкін.

“Қазір ең бастысы — балаларға қысым жасамау. Олар әлі ештеңе ұтқан жоқ, сондықтан шамадан тыс мадақтаудың қажеті жоқ. Бір сәтте бүкіл бір буынды жоғалтып алу қаупі бар,” – деді ол.

Самат Смақов жас футболшыларға артық эфир мен даңқтан гөрі тәжірибе мен тұрақты жұмыс қажет екенін атап өтті.