Қарағанды-Балқаш тас жолында болған жол апатынан үш адам қаза тапты, деп хабарлайды Zhaiyqmedia ақпарат агенттігі.
Қайғылы оқиға 18 наурызда «Астана-Қарағанды-Алматы» автожолының бойында, Ақшатау кентінен Қарағандыға қарай 40 шақырым жерде болған.
Алдын ала мәлімет бойынша, Chevrolet Cobalt көлігі ұзақ бұрылыста жолдан шығып кетіп, аударылған. Әлеуметтік желіде тараған видео авторы жүргізуші рөлде ұйықтап кеткен болуы мүмкін деп болжайды.
Жол-көлік оқиғасы салдарынан 30 жастағы жүргізуші мен оның екі жолаушысы алған ауыр жарақаттарынан оқиға орнында көз жұмды.
Полиция аталған дерек бойынша қылмыстық іс қозғап, сотқа дейінгі тергеуді бастады. Тәртіп сақшылары жүргізушілерді жол қозғалысы ережелерін қатаң сақтауға, ауа райы мен жол жағдайын ескеруге және жылдамдықты асырмауға шақырды.
Фото: Әлеуметтік желіден
