Ұлыбритания Қорғаныс министрлігі Украинаны әлі әзірленбеген жаңа тактикалық баллистикалық зымырандармен қаруландыруды жоспарлап отырғанын мәлімдеді, деп хабарлайды Zhaiyqmedia ақпарат агенттігі.
«Біріккен Корольдік Украинаның атыс қуатын арттырып, Путиннің әскери машинасынан қорғану қабілетін күшейтетін жаңа тактикалық баллистикалық зымырандар жасайды», — делінген үкіметтің баспасөз хабарламасында.
Әңгіме ұшу қашықтығы 500 шақырымнан асатын, салмағы шамамен 200 келі болатын оқтұмсығы бар зымырандар туралы болып отыр. Бұл қаруды жасау жобасы «Project Nightfall» деп аталады.
«Nightfall зымырандарын түрлі жерүсті техникасынан ұшыруға болады. Бірнеше зымыранды бірінен соң бірін жылдам атып, санаулы минут ішінде шегініп кетуге мүмкіндік бар. Бұл украиналық әскерге ресейлік күштер жауап беріп үлгергенше негізгі әскери нысандарға соққы жасауға жол ашады», — деп жазылған хабарламада.
Желтоқсан айында британдық Қорғаныс министрлігі осындай қарудың алғашқы үлгілерін әзірлеуге және жасауға байқау жариялаған. Өтінімдер ақпан айының басына дейін қабылданады. Наурыз айында таңдалған үш компанияның әрқайсысы бір жыл ішінде сынаққа дайын зымырандар жасау үшін 9 миллион фунт стерлингтен алады.
Осыдан кейін Ұлыбритания айына 10 зымыран өндіруді көздеп отыр. Жоспар бойынша әр зымыранның құны 800 мың фунттан (шамамен 1,07 млн доллар) аспауы тиіс.
