Қазақстан Үкіметі мемлекеттік қызметкерлерді ынталандыру ережелерін өзгертті. Енді шенеуніктерге мерекелер мен мерейтойларға ғана емес, туған күніне орай да сыйақы беруге рұқсат етілді, деп хабарлайды Zhaiyqmedia ақпарат агенттігі.
Бұдан былай әрбір мемлекеттік органның басшысы сыйақы берудің шарттарын, мөлшері мен тәртібін дербес бекіте алады. Қаулы 1 қаңтардан бастап күшіне енеді.
Жаңа ережеге сәйкес, сыйақы тек мерекелік немесе жеке даталарға ғана емес, сонымен қатар бірқатар қызметтік жетістіктер үшін де тағайындалады. Олардың қатарында:
– Қызметтік міндеттерді үлгілі атқарғаны үшін;
– Мінсіз қызметі мен елеулі жетістіктері үшін;
– Аса маңызды және күрделі тапсырмаларды орындағаны үшін;
– Белгілі бір кезеңдегі жұмыс қорытындысы бойынша;
– Президент пен Үкімет тапсырмаларын сапалы орындау;
– Лауазымдық міндетіне кірмейтін заң жобаларын әзірлеуге қатысқаны үшін.
Сыйақы мөлшерін анықтау кезінде қызметкердің жұмысын бағалау нәтижелері де ескерілетін болады.
