Қазақстанда 10 мың гектардан астам жері бар ірі жер пайдаланушылар енді мал шаруашылығымен айналысуға міндеттеледі. Бұл талапты орындамағандар жерінен айырылуы мүмкін, деп хабарлайды Zhaiyqmedia ақпарат агенттігі.
Үкіметтің кеңейтілген отырысында Премьер-министр Олжас Бектенов бұл бастама ауылдағы маусымдық жұмыссыздық мәселесін шешуге және мал шаруашылығын дамытуға бағытталғанын мәлімдеді. Оның айтуынша, елімізде егін шаруашылығы қарқынды дамығанымен, мал шаруашылығының өсімі небәрі 2–3% деңгейінде қалып отыр.
«Асыл тұқымды мал алуға жеңілдетілген несие қарастырылады, малшылардың балаларына білім гранттары бөлінеді. Сондай-ақ отарлы мал шаруашылығын дамыту мен қолдан ұрықтандыру технологияларына басымдық беріледі», – деді Үкімет басшысы.
Сонымен қатар, 2026 жылы Жамбыл облысында ірі жоба іске қосылмақ. Қытайлық Fufeng Group компаниясы жүгеріні терең өңдейтін зауыт салады. Бұл зауыт жыл сайын 3 миллион тонна жүгеріні қажет етеді, ал Қазақстан қазір оның үштен бірін ғана өндіріп отыр.
