Сурет: ҚР СІМ
Қазақстанның Кореядағы елшісі Асет Исенали Корея Ұлттық Ассамблеясының депутаты Ли Чжэ Канмен кездесті, деп хабарлайды Zhaiyqmedia.kz ақпарат агенттігі.
Кездесуде тараптар парламентаралық ынтымақтастықтың өзекті мәселелерін және саяси, сауда-экономикалық, инвестициялық, гуманитарлық салалардағы өзара іс-қимылды кеңейту перспективаларын талқылады. Қазақстан Президенті Қасым-Жомарт Тоқаевтың Кореяға жоспарланған сапары мен «Орталық Азия – Корея Республикасы» саммитіне дайындыққа ерекше назар аударылды. Тараптар бұл шаралар екіжақты стратегиялық әріптестікке серпін беретініне сенім білдірді.
Қазақстандық дипломат кореялық парламентарийге Қазақстандағы саяси реформалар, заң үстемдігін нығайту және инвестициялық ахуал туралы айтып, жаңа Конституцияның негізгі ережелерімен таныстырды. Сондай-ақ корей диаспорасының екі ел арасындағы достықты нығайтудағы рөлі атап өтілді.
Кездесу қорытындысы бойынша тараптар парламентаралық байланыстарды нығайтуға, гуманитарлық ынтымақтастықты кеңейтуге және жаңа бірлескен бастамаларды ілгерілетуге өзара мүдделіліктерін растады.
