Ішкі істер министрлігі алдағы амнистияға кімдер ілігетінін және кімдерден жеңілдік күтуге болмайтынын ресми түрде түсіндірді. Ведомство сондай-ақ әкімшілік амнистия енгізу мәселесін де қарастырып жатыр, деп хабарлайды Zhaiyqmedia.kz ақпарат агенттігі.
Министрлік өкілдерінің айтуынша, амнистия ең алдымен жеңіл қылмыс жасағандарға, сондай-ақ бірқатар әлеуметтік осал топтарға қатысты болады. Олардың қатарында кәмелетке толмағандар, жүкті әйелдер, зейнеткерлер және мүгедектер бар.
«Амнистия ауыр қылмыс жасағандарға, сондай-ақ бұрын сотталғандарға қолданылмайды. Біз қоғамдық қауіпсіздікті ескере отырып, әділ шешім қабылдауға тырысамыз», – деді ІІМ ресми өкілі.
Сонымен қатар әкімшілік амнистия енгізу мәселесі де пысықталуда. Бұл жеңіл әкімшілік құқық бұзушылық жасаған азаматтарды жазадан босатуды көздейді. Нақты мерзімдер мен шарттар әзірге белгісіз.
