Маңғыстау облысының Бейнеу ауылында жер телімін өз анасының атына рәсімдеген әкімге қатысты әкімшілік іс қозғалды. Бұл туралы Lada.kz хабарлайды, деп жазады ZhaiyqMedia.
Жер телімі анасынa берілген: мүдделер қақтығысы болған
Бейнеу аудандық сотында қаралған істе Бейнеу ауылының әкімі Нұржан Кеңбаев үй салу үшін жер телімін өз анасының атына рәсімдегені көрсетілген. Аталған жер телімі Бейнеу ауылының аумағында орналасқан.
Сот материалдарына сәйкес, әкім өз міндеттерін атқара отырып, сыбайлас жемқорлыққа қарсы заңнаманың бұзылуын болдырмау үшін тиісті шаралар қолданбаған. Сонымен қатар, жақын туысына қатысты шешім қабылдау кезінде пайда болған мүдделер қақтығысы туралы өзінің тікелей басшылығын жазбаша түрде хабардар етпеген.
Әкім кінәсін мойындап, айыппұл мөлшерін азайтуды сұрады
Сот отырысында Нұржан Кеңбаев әкімшілік құқық бұзушылықты жасағанын мойындап, отбасының қаржылық жағдайына байланысты айыппұл көлемін азайтуды өтінді.
Сот оның кінәсін келесідей дәлелдермен негіздеген:
- әкімнің өз түсініктемесі;
- әкімшілік құқық бұзушылық туралы хаттама;
- профилактика бөлімінің қызметкерінің рапорты;
- істің басқа да материалдары.
393 200 теңге айыппұл салынды, қызметінде қалды
Сот ауырлататын жағдайлар таппаған. Қаулыға сәйкес, Нұржан Кеңбаев ҚР ӘҚБтК-нің 680-бабы бойынша кінәлі деп танылып, 393 200 теңге көлемінде әкімшілік айыппұл төлеуге міндеттелді. Сот қаулысы заңды күшіне енді.
Басылым мәліметінше, әкім қызметінен босатылмаған және өз жұмысын жалғастырып жатыр.
