Жамбыл облысында мерзімді әскери қызметшінің қазасына қатысты №21450 әскери бөлімі ротасының командирі ұсталды, деп хабарлайды Zhaiyqmedia ақпарат агенттігі.
Бұл ақпаратты Ішкі істер министрлігі ресми сауалға берген жауабында растады. Ведомствоның мәліметінше, 29 қаңтарда ІІМ Әскери-тергеу департаменті Қорғаныс министрлігі әскери бөлімінің лауазымды тұлғаларына қатысты ҚР Қылмыстық кодексінің 453-бабы («Қызметке салғырт қарау») бойынша соталды тергеуді бастаған.
«Соталды тергеу барысында әскери бөлімнің рота командирі ұсталды. Сот оған қатысты әскери қызметшіні әскери бөлім басшылығының бақылауына беру түріндегі бұлтартпау шарасын таңдады», – делінген ІІМ жауабында.
Бұған дейін рота командирі Аманкелді Құсайыновтың әпкесі мен әскери қызметші Аяулым Отарова редакцияға хат жолдап, офицерді қудалау негізсіз деп санайтынын мәлімдеген. Олардың пікірінше, командирдің іс-әрекеті мен қайғылы оқиға арасында ешқандай байланыс жоқ. Сондай-ақ Аяулым Отарова өзіне және кәмелетке толмаған бес баласына қысым көрсетіліп жатқанын айтқан.
Фото: Әлеуметтік желіден
