ҚР Экология және табиғи ресурстар министрлігінің дерегінше, 2026 жылдың қаңтар айы республика аумағында салыстырмалы түрде жылы әрі жауын-шашынды болады деген болжам бар.
Бұл ақпарат халық үшін маңызды, себебі күрт суытулар мен ауа райының құбылуы жол және тұрмыстық қауіпсіздікке тікелей әсер етеді.
Бұл туралы Zhaiyqmedia.kz ақпарат агенттігі хабарлайды.
Синоптиктердің мәліметіне сай, еліміздің басым бөлігінде айлық орташа температура климаттық нормадан 1-2 градусқа жоғары болуы мүмкін.
Жауын-шашын мөлшері көпшілік өңірлерде қалыпты деңгейде болады. Бірақ Павлодар, Солтүстік және Шығыс Қазақстан облыстарында, сондай-ақ Қостанай, Ақмола, Қарағанды, Абай облыстарының кей аудандарында нормадан артық жауын-шашын күтіледі.
Алматы, Жамбыл, Түркістан және Жетісу облыстарының оңтүстік-шығысында да ылғалды күндер көп болады деп болжануда.
Қаңтарда ауа райы қандай құбылмалы болады?
Ай бойы күн ашық әрі аязды болып, кей күндері боран, екпінді жел, көктайғақ пен тұман ауысып тұрады.
Батыс өңірде қаңтардың басында түнгі температура -18°С-қа дейін түсіп, күндіз -12°С шамасында болады. Кейін ауа райы біраз жылынып, оң көрсеткіштерге көтеріледі.
Солтүстік, солтүстік-батыс және орталық облыстарда түнде -20°С дейін аяз күтіліп, күндіз -5°С пен +3°С аралығында болады.
Қай өңірде ең қатты аяз болады?
Екінші және үшінші онкүндіктерде суық толқындарының нәтижесінде солтүстік, шығыс және орталық өңірлерде түнгі аяз -35°С-қа жетуі ықтимал. Күндіз -20°С дейін төмендеуі мүмкін.
Батыс өңірде де суық күшейіп, түнде -27°С, күндіз -19°С болмақ. Дегенмен кей күндері күн күрт жылымсып, +5°С-қа дейін көтерілуі де мүмкін.
Оңтүстік аймақтарда қаңтардың көп бөлігінде температура біршама тұрақты болады, бірақ үшінші онкүндіктің кей күндерінде түнгі ауа райы -30°С-қа дейін суытып, күндізгі температура -18°С дейін төмендеуі мүмкін.
Айта кету керек, бұл консультативтік болжам екенін ескерген жөн. Синоптикалық жағдайда өзгерістер болса, нақты мәліметтер онкүндік болжамдарда нақтыланбақ.
