Қазақстанда жануарларға қатыгездік көрсеткендер үшін қылмыстық жауапкершілік күшейтіледі. Енді мұндай әрекеттер 3 жылға дейін бас бостандығынан айырумен жазалануы мүмкін, деп хабарлайды Zhaiyqmedia.kz ақпарат агенттігі.
Мәжіліс депутаттары дайындаған заң жобасы жануарлар дүниесін қорғауға бағытталған. Құжатта жануарларды азаптау, мүгедек ету немесе өлтіру сияқты әрекеттерге қатаң жаза қарастырылған.
«Бұл – Президенттің тапсырмасын орындау аясындағы маңызды қадам. Қоғамда жануарларға деген қатыгездікке төзбеушілік артып келеді», – деді депутаттар.
Жаңа норма бойынша, кінәлілерге 3 жылға дейін бас бостандығынан айыру, не ірі көлемде айыппұл салынуы мүмкін. Бұл шаралар жануарларды қорғау жүйесін жетілдіруге және қоғамдық тәртіпті нығайтуға ықпал етеді деп күтілуде.
Заң жобасы қазір Мәжілістің қарауында. Ол қабылданса, Қазақстанда жануарларға қатысты құқық бұзушылықтардың алдын алуға мүмкіндік туады.
