Сурет: Egemen Qazaqstan
Әлеуметтік желілерде Нұрлан Сабуровтың Ереванда жоспарланған концертіне қарсы пікірлер көбейді. Әзілкештің концерті 5 шілде күні Еревандағы Карен Демирчян атындағы спорт-концерт кешенінде өтуі керек. Алайда әлеуметтік желілерде кейбір қолданушылар шараны өткізбеуге шақырып, түрлі айыптаулар айтып жатыр, деп хабарлайды Zhaiyqmedia.kz ақпарат агенттігі.
Желіде жарияланған жазбаларда Сабуровтың Ресей әскери құрылымдарына қолдау көрсеткені туралы мәлімдемелер тараған. Кейбір пайдаланушылар бұл мәселеге Арменияның құқық қорғау органдары назар аударып, тексеру жүргізуі қажет деп есептейді. Аталған жарияланымдардың астында мұндай талаптарды қолдаған пікірлер көптеп жазылған.
Еске салсақ, биыл ақпан айында Нұрлан Сабуров Мәскеудегі Внуково әуежайында ұсталып, оған Ресейге кіруге уақытша тыйым салынғаны жөнінде хабарланған. Кейін ол Алматыға оралды.
Одан кейін Қазақстанда әзілкештің Ресей әскери қызметкерлеріне мотоциклдер беруі мүмкін деген ақпаратқа байланысты тексеру жүргізілгені хабарланған еді.
Жуырда оның жұбайы Диана Сабурова отбасының Алматыға көшетінін мәлімдеген болатын.
Айта кетейік Нұрлан Сабуров Дубайда өткен концертінде Ресейде орыс тілінен тест тапсыра алмай қалғанын айтқан болатын.
