25 сәуірде Мемлекет басшысы Қасым-Жомарт Тоқаевтың өзі қатысқан сенбілікте еліміз бойынша 46 мың гектардан астам аумақ қоқыстан тазартылды. Бұл – «Таза Қазақстан» акциясы аясындағы ең ірі шаралардың бірі, деп хабарлайды Zhaiyqmedia.kz ақпарат агенттігі.
Сенбілікке президенттен бөлек, министрлер, әкімдер және қарапайым азаматтар қатысты. Барлығы бірігіп, парктер, жағалаулар, тұрғын алаптар мен өндіріс орындарының маңын ретке келтірді.
«Мұндай іс-шаралар – табиғатқа деген жауапкершілікті арттырудың тиімді жолы. Әркім өз үйінің маңын таза ұстаса, жалпы ахуал өзгереді», – деді Қасым-Жомарт Тоқаев сенбілік барысында.
Экологиялық акция республика бойынша жалғасуда. Алдағы апталарда да тұрғындарды тазалық шараларына белсенді қатысуға шақыру жоспарланған.
