Қазақстанда мектеп оқушыларына сабақ кезінде смартфон қолдануға тыйым салу мәселесі қаралып жатыр. Мәжіліс білім беру саласындағы заң жобасын бірінші оқылымда мақұлдады.
Жаңа құжат «Педагог мәртебесі және білім беру» бағытын қамтиды. Онда мұғалімдердің құқығын кеңейтіп, оқушылардың сабақ үстінде телефон ұстауына шектеу қою көзделген.
Депутаттардың айтуынша, бұл шара оқу үлгерімін арттырып, балалардың назарын сабаққа аударуға көмектеседі. Қазіргі уақытта көптеген мектепте смартфон сабақтың басты кедергісіне айналған.
«Балалар сабақта емес, әлеуметтік желіде отырады. Мұғалімдердің беделін көтеру үшін де осындай түзетулер қажет», – деді Мәжіліс депутаты.
Заң жобасы екінші оқылымда пысықталып, кейін қолданысқа енгізіледі. Ата-аналар мен педагогтар жаңашылдықты екіұшты қабылдап отыр. Біреулері балалардың қауіпсіздігі үшін телефон қажет десе, енді біреулері тыйым салуды қолдайды.
Бұл шешімнің түпкі нәтижесі қандай болатынын уақыт көрсетеді. Ал әзірге оқушылардың смартфонға деген тәуелділігін азайту – білім саласындағы басты мақсаттардың бірі, деп хабарлайды Zhaiyqmedia.kz ақпарат агенттігі.
