Қазақстанда 43 мыңнан астам жетім бала баспана кезегінде тұр. Бұл – ресми статистика, бірақ нақты жағдай одан да ауыр болуы мүмкін. Сенатор Андрей Лукин мәселенің әлі де шешілмегенін айтып, дабыл қақты, деп хабарлайды Zhaiyqmedia.kz ақпарат агенттігі.
Сенатордың сөзінше, жетім балалардың баспана алу кезегі жылдан-жылға ұзарып келеді. Көптеген бала кәмелетке толғанша пәтер ала алмай, кезекте қалады. Бұл олардың болашағына кері әсер етеді.
«Жетім балаларды үймен қамтамасыз ету – мемлекеттің басты міндеттерінің бірі. Бірақ қазіргі жүйе тиімсіз, кезекте тұрғандардың саны азаймай тұр», – деді Андрей Лукин.
Сенатор жергілікті әкімдіктерге балалар үйінің түлектерін алдымен тұрғын үймен қамтамасыз етуді тапсыруды ұсынды. Сондай-ақ, баспана беру тетіктерін қайта қарау керек екенін атап өтті.
