АҚШ президенті Дональд Трамп Иранмен арадағы келіссөздер сәтсіз аяқталғаннан кейін Ормуз бұғазын толық бұғаттауға бұйрық бергенін жариялады, деп хабарлайды Zhaiyqmedia ақпарат агенттігі.
Трамп бұл шешімді әлеуметтік желідегі парақшасында жазып, АҚШ әскери-теңіз күштерінің іс-қимыл жоспарын нақтылады.
«АҚШ-тың әлемдегі ең үздік әскери-теңіз күштері Ормуз бұғазына кірмек болған немесе одан шықпақ болған кез келген кемені бұғаттау процесін дереу бастайды. Сонымен қатар мен флотымызға халықаралық суларда Иранға баж салығын төлеген әрбір кемені іздеп, ұстауды тапсырдым. Заңсыз алым төлеген ешкім ашық теңізде қауіпсіз жүзе алмайды. Біз ирандықтардың бұғазға орнатқан миналарын да жоя бастаймыз», — деп жазды Трамп.
Ол Иранның «бұл жағдайды қалай тоқтату керегін бәрінен жақсы білетінін» атап өтті.
«Бұғаттау жақын арада басталады. Бұл шараға басқа елдер де қатысады. Иранға осы заңсыз бопсалау әрекетінен пайда табуға жол берілмейді», — деп қосты АҚШ президенті.
Фото: Punit PARANJPE / AFP via Getty Images
