Батыс Қазақстан облысының Ақсай қаласында 23 жастағы жігітті өлтірген мектеп күзетшісіне қатысты сот үкімі шықты, деп хабарлайды Zhaiyqmedia ақпарат агенттігі.
Қайғылы оқиға биыл 29 қаңтарда А.Н. Қонаев атындағы орта мектепте болған. Сол күні сағат 20:30 шамасында 53 жастағы күзетші Райымбек Төреғалиев шақыртумен келген «Бүркіт» агенттігінің жедел тобының қызметкері Бақытжан Базарбаевқа пышақ жұмсаған.
Сот-медициналық сараптама қорытындысы бойынша, күзетші қылмыс кезінде мас болғаны анықталды. Ал ауыр жарақат алған 23 жастағы Бақытжан Базарбаев ауруханада көз жұмды.
Сотта Райымбек Төреғалиев ҚР Қылмыстық кодексінің 99-бабының 1-бөлігімен («Адам өлтіру») кінәлі деп танылып, өз кінәсін толық мойындады.
Бөрлі аудандық сотының үкімімен Р. Төреғалиев 11 жылға бас бостандығынан айырылды. Сонымен қатар, ол жәбірленуші тарапқа 10 миллион теңге моральдық және 1 миллион 72 мың теңге материалдық шығын өтеуге міндеттелді.
