«Қайрат» футбол клубы мен Қазақстан құрамасының қақпашысы Темірлан Анарбеков УЕФА Чемпиондар лигасының топтық кезеңінің қорытындысы бойынша үздік үш қақпашының қатарына енді, деп хабарлайды Zhaiyqmedia ақпарат агенттігі.
УЕФА-ның ресми статистикасы бойынша, 22 жастағы қазақстандық спортшы сейвтер саны жағынан жоғары көрсеткішке қол жеткізген. Ол топтық кезеңде өткен 6 матчта өз қақпасына бағытталған 26 қауіпті соққыға тосқауыл бола алды.
Бұл көрсеткіш бойынша Анарбеков франциялық «Марсель Олимпигі» клубының қақпашысы Херонимо Рульимен үшінші орынды бөлісіп тұр.
Үздіктер тізімінде бірінші орынға норвегиялық «Буде-Глимт» командасының ойыншысы Никита Хайкин жайғасса, екінші сатыда мадридтік «Реалдың» жұлдызы Тибо Куртуа тұр. Қазақстандық қақпашының осындай беделді ойыншылармен бір қатарда тұруы – отандық футбол үшін үлкен жетістік.
Фото: Әлеуметтік желіден
