«Нұрайды ұрлау» ісіне қатысты қоғамдық резонанстан кейін жұмыстан босатылған полиция қызметкері Әбілғазы өзіне әділетсіздік жасалғанын айтып, оқиғаның мән-жайын баяндады, деп хабарлайды Zhaiyqmedia ақпарат агенттігі.
Жұмыстан қуылған полиция офицері бұл туралы заңгер Айгүл Орынбекке берген сұхбатында айтты.
Оның сөзінше, Нұрайды алып қашқан күні ол шақырту бойынша Шерханның үйіне барған. Ол жерде қызды жігіттің туыстары күтіп алып, тойға қызу дайындық жүріп жатқан.
«Мен қыз бен жігітті АІІБ-ге (аудандық ішкі істер бөлімі) жеткіздім. Сол жерде екеуін бірге және жеке-жеке сұрадым. Екеуі де қыздың өз еркімен келгенін растады. Кейінірек ол мұны мен жазып алған видеода да растады», — дейді ол.
Видеожазбада Нұрайдың 4 қазан күні сағат 21:00-де үш айдай араласқан Шерхан есімді жігітімен бірге Алматыдан Шымкентке өз еркімен шыққаны айтылған.
Полицей бұл видеоны Шымкент қалалық полиция департаментінің баспасөз қызметіне жариялауды ұсынғанын, алайда олар еш себепсіз бас тартқанын алға тартады.
Ол ішкі істер органдарында тоғыз жыл қызмет еткенін, бірақ қоғамдық резонансқа байланысты ІІМ бұйрығымен өзімен бірге бірнеше басшысының жұмыстан шығарылғанын жеткізді.
«Маған әділетсіздік жасалды, мені қоқыс сияқты лақтырып жіберді», — дейді жұмыстан қуылған офицер.
Сондай-ақ жұмыстан шығарылғаны туралы хабарды естіген полицейдің анасы ауыр қайғыны көтере алмай, көз жұмғаны айтылады.
Сұхбат соңында Әбілғазы президент Қасым-Жомарт Тоқаевқа үндеу жасап, әділ шешім қабылдануына ықпал етуін сұрады.
Фото: Әлеуметтік желіден
