OpenAI компаниясы ChatGPT нейрожүйесіне пайдаланушының жасын анықтайтын жаңа функция енгізді. Егер жүйе қолданушының 18 жасқа толмағанына күмәнданса, онда күшейтілген сүзгілер автоматты түрде іске қосылады, деп хабарлайды Zhaiyqmedia ақпарат агенттігі.
ChatGPT пайдаланушының мінез-құлқын, яғни белсенділік уақытын, аккаунтының ашылған мерзімін, қолдану стиліндегі өзгерістерді, тіркелу кезінде көрсетілген жасын және басқа да белгілерді талдайды.
Шектеуге зорлық-зомбылық, қауіпті челлендждер, романтика мен эротика, дене мүшесіне зақым келтіру, зиянды диеталарды насихаттау, сұлулықтың қатаң стандарттары және бодишеймингке қатысты контент жатады.
«Егер сәл де болса күмән туындаса, контентке қолжетімділік шектеледі. Яғни, деректер толық болмаған немесе бір-біріне қайшы келген жағдайда, нейрожүйе пайдаланушыны жасөспірім деп есептейді», — делінген OpenAI хабарламасында.
Егер кәмелетке толған адам қателесіп, жасөспірімдер қатарына қосылып кетсе, Persona жеке басты верификациялау сервисі арқылы фотосуретпен өз жасын растай алады. Компания өкілдері тексерудің көп уақыт алмайтынына уәде берді.
Жасты болжау жүйесі – нейрожүйенің «ересектерге арналған режимін» іске қосуға дайындықтың бір бөлігі екені айтылады.
Жақында Илон Маск OpenAI негізін қалаушы Сэм Альтманды сотқа берген болатын. Маск оны алдап соқты деп айыптайды.
Фото: Freepik.
