Түркия Иран аумағына кез келген әскери шабуыл жасауға үзілді-кесілді қарсы екенін мәлімдеді, деп хабарлайды Zhaiyqmedia ақпарат агенттігі.
Бұл туралы Түркияның Сыртқы істер министрі Хакан Фидан жергілікті және шетелдік БАҚ өкілдеріне арналған брифингте айтты. Ол Анкараның бұл ұстанымы халықаралық қатынастар тұрғысынан өте маңызды екенін атап өтті, себебі Иран қазірдің өзінде жүргізіп отырған саясатына байланысты санкцияларға ұшыраған.
Фиданның айтуынша, ол ирандық әріптестерімен келіссөздер барысында Тегеранға аймақтағы елдермен арадағы келіспеушіліктерді реттеу қажеттігін жеткізген.
«Жаһандық ядролық проблемаға келетін болсақ, Иран экономикалық қиындықтар тудыратын құрылымдық мәселелерді жою үшін келіспеушіліктерді кідіріссіз, дипломатиялық жолмен шешуі керек», — деді министр.
Сондай-ақ, ведомство басшысы халықаралық оқшаулану жағдайында Иранда бірқатар экономикалық қызмет түрі шектелгеніне назар аударды. Оның сөзінше, бұл жағдай халық арасында наразылық тудырып отыр.
Министр Иранға қарсы пиғылдағы кейбір елдердің режимге деген дұшпандығын пайдаланып, елге басып кіруіне жол бермеу керектігін ескертті. Дегенмен, ол АҚШ президенті Дональд Трамптың саясатын мысалға келтіріп, оның құрлықтағы әскерді жиі қолдана бермейтінін де атап өтті.
Бұған дейін Reuters агенттігі еуропалық шенеуніктерге сілтеме жасап, АҚШ-тың 24 сағат ішінде Иранға соққы беруі мүмкін екенін жазған болатын. Ал Тегеран өз кезегінде Вашингтон тарапынан агрессия болған жағдайда, америкалық әскери базалары бар көрші елдерге шабуыл жасайтынын ескерткен.
АҚШ президенті Дональд Трамп бірнеше рет егер Тегеран шерулерді күшпен басып, адам өліміне жол берсе, ирандық наразыларға көмек көрсететінін айтқан еді. Кейінірек Трамп Иранға қатысты райынан қайтып, елде наразылардың өлімі тоқтағанын мәлімдеген.
Хакан Фидан Түркия Ислам республикасындағы оқиғалардың дамуын мұқият бақылап отырғанын және Тегеранның халықаралық қауымдастықпен арадағы келіспеушіліктерді реттеуіне мүдделі екенін қосты.
Фото: Әлеуметтік желіден
