Ақтаудан шыққан Меруерт Бижанова әлемдегі ең беделді жоғары оқу орындарының бірі — Оксфорд университетінің оқытушылар құрамына қабылданды. Ол Teaching Fellow лауазымына тағайындалып, әрі қарай ғылыми жұмысын жалғастырып, дәріс оқиды, деп хабарлайды Zhaiyqmedia ақпарат агенттігі.
Меруерт 2019 жылы Назарбаев Зияткерлік мектебін тәмамдаған. Мектепті аяқтағаннан кейін АҚШ-тағы Пенсильвания университетіне оқуға түсіп, ол жерде студенттік қауымдастықтың белсенді мүшесіне айналған. Тіпті студенттер ассамблеясының президенті қызметін де атқарған.
2025 жылы ол Оксфорд университетінің докторантурасына қабылданды. Бұл — білім жолындағы тағы бір жоғары белес.
«Оксфордтағы оқытушылық қызметке тағайындалуым — жүйелі еңбегімнің нәтижесі және университеттің маған білдірген сенімі деп білемін. Енді мен ғылыми-зерттеу жұмыстарымды жалғастырып қана қоймай, өз тәжірибем мен білімімді болашақ жас мамандарға жеткізуді көздеп отырмын», — деді Меруерт Бижанова.
Фото: Маңғыстау облысының Орталық басқару орталығы
