Алдағы күндері Қазақстан аумағына Жерорта теңізі аймақтарынан келген циклон әсер етпек. «Қазгидромет» мәліметінше, елдің басым бөлігінде қар жауып, боран соғады, ал кей өңірлерде жаңбыр мен қар аралас түседі.
Бұл құбылыс әсіресе жол қозғалысына және көлік қатынасына қиындықтар тудыруы мүмкін. Тұман, көктайғақ пен екпінді жел болатыны да ескертілді.
Бұл туралы Zhaiyqmedia.kz ақпарат агенттігі хабарлайды.
Қар мен жаңбыр қай аймақтарда болады?
3 қаңтар күні солтүстік-батыс өңірлерде қатты қар түссе, 5 қаңтарда жауын-шашынның негізгі бөлігі оңтүстік-шығысқа ауысады.
Болжам бойынша:
- Батыс аймақтарда түнде 0°С-тан -8°С-қа дейін, күндіз -2°С пен +5°С аралығында;
- Орталықта түнде -10°С пен -18°С, күндіз -5°С пен -12°С арасында аяз болады;
- Оңтүстікте түнгі ауа температурасы -0°С пен -10°С, күндіз -6°С пен +2°С аралығында;
- Оңтүстік-шығыста түнде -0°С пен -5°С, таулы аймақтарда -8°С…-13°С, күндіз -2°С пен +3°С, тауларда -5°С…-10°С;
- Шығыста түнде -5°С…-13°С, күндіз -5°С…-10°С суық болады.
Жолда абай болу неге маңызды?
Синоптиктер келесі күндері ауа райының тұрақсыз болатынын, ал көлік жолдарында көктайғақ пен нашар көріну жағдайлары туындауы мүмкін екенін ескертеді.
Сондықтан жүргізушілер мен жолаушыларға барынша сақ болуға кеңес беріледі.
