Сурет: Shutterstock/FOTODOM/SGr
Италия мен Франция БҰҰ-ның Ливандағы уақытша бітімгерлік күштері (UNIFIL) миссиясы аяқталғаннан кейін елдің оңтүстігіне әскери контингент орналастыруға дайындалып жатыр, деп хабарлайды Zhaiyqmedia.kz ақпарат агенттігі.
Франция Сыртқы істер министрлігіндегі дереккөз «Әл-Арабия» телеарнасына бұл жоба АҚШ пен бірқатар Еуропа елінің қолдауымен жүзеге асатынын мәлімдеді. Жаңа контингент Ливан билігінің ресми өтініші бойынша ұлттық армияны күшейту және өңірдегі тұрақтылықты сақтау үшін орналастырылады.
Париж сондай-ақ Ливан мен Израиль арасындағы соңғы негіздемелік келісімге байланысты қауіпсіздік шараларын ескере отырып, күштерді орналастырудың түпкілікті тетігін келісу үшін серіктестермен консультациялар жалғасып жатқанын атап өтті, — деп хабарлады «Әл-Арабия».
2025 жылы БҰҰ Қауіпсіздік Кеңесі UNIFIL миссиясын аяқтау туралы қарар қабылдады. Әскерді толық шығару 2027 жылға дейін аяқталуы тиіс. Миссия 1978 жылы Ливан мен Израиль арасындағы атысты тоқтату режимін бақылау үшін құрылған. 2006 жылғы қарулы қақтығыстан кейін оның мандаты кеңейтіліп, контингент саны 15 мың әскери қызметшіге дейін жеткен.
Маусым айының басында Израиль БАҚ АҚШ әкімшілігі Ливанның оңтүстігіндегі БҰҰ бітімгерлік күштерін қолдауды тоқтату мүмкіндігін қарастырып жатқанын хабарлаған. Италия мен Франция дәстүрлі түрде UNIFIL миссиясына ең көп әскери қызметші жіберетін елдер қатарында. Жаңа бастама Франция президенті Эмманюэль Макрон мен Италия премьер-министрі Джорджа Мелони арасындағы келіссөздерден кейін жарияланды.
