Сурет: Ашық дереккөз
Степногорск әкімінің орынбасары мен мемлекеттік активтер бөлімінің басшысы заңбұзушылықтар салдарынан тәртіптік жауапкершілікке тартылды, деп хабарлайды Zhaiyqmedia.kz ақпарат агенттігі.
Қала әкімдігі қысқы және жазғы күтіп-ұстау жұмыстарын жоспарлау барысында бюджет заңнамасын бұзған. Прокуратураның мәліметінше, бұзушылықтар сметалық құнның негізсіз жоғарылауына, артық және экономикалық тұрғыдан негізделмеген жұмыс көлемдерінің енгізілуіне, сондай-ақ заңға сәйкес келмейтін және бәсекелестікті шектейтін талаптардың қойылуына байланысты болған.
Осыған орай прокуратура жалпы сомасы 1,1 миллиард теңгені құрайтын 9 мемлекеттік сатып алу конкурсының күшін жойды. Сметалық құн төмендетіліп, бюджеттен негізсіз жұмсалуы мүмкін 386 миллион теңге көлеміндегі шығындар алынып тасталды. Нәтижесінде мемлекеттік қаражат үнемделді.
Ведомство өңірдегі бюджет қаражатының мақсатты әрі тиімді пайдаланылуы прокуратура органдарының тұрақты бақылауында екенін атап өтті.
