Францияның құқық қорғау органдары X әлеуметтік желісінің иесі Илон Маскқа қатысты тергеу жүргізіп жатыр. Нәтижесінде оны қамауға алу ордері шығарылуы мүмкін, деп хабарлайды Zhaiyqmedia.kz ақпарат агенттігі.
Париж прокуратурасының мәліметінше, тергеу барысында X желісіндегі контентті модерациялауға қатысты заң бұзушылықтар анықталған. Франция билігі Масктың платформасында жеккөрушілік насихаты мен жалған ақпараттың таралуына жол берілгенін айтады.
Тергеу Масктың Франциядағы өкілдеріне де қатысты жүргізілуде. Егер кінәсі дәлелденсе, оған 5 жылға дейін бас бостандығынан айыру жазасы қауіп төндіруі мүмкін, — деді прокуратура өкілі.
Масктың өзі әзірге бұл ақпаратқа ресми түрде жауап берген жоқ. Дегенмен, оның адвокаттары тергеуге белсенді қатысып, айыптарды жоққа шығаруға тырысуда.
Франция билігінің бұл қадамы Еуропадағы цифрлық платформаларды реттеу саясатының қатаңдағанын көрсетеді. X желісі бұған дейін де Германия мен Ұлыбританияда сынға ұшыраған еді.
