Премьер-министр Олжас Бектенов жеңіл өнеркәсіп саласындағы мемлекеттік қолдау тетіктерін қайта қарауды міндеттеді. Бұл – экономиканы әртараптандыру және отандық өндірісті көтеру жолындағы маңызды қадам, деп хабарлайды Zhaiyqmedia.kz ақпарат агенттігі.
Үкімет басшысы жеңіл өнеркәсіптің даму қарқыны әлі де төмен екенін атап өтті. Оның айтуынша, қолданыстағы шаралар тиісті нәтиже бермей отыр.
«Бізге саланы түбегейлі жаңарту керек. Қолдау тетіктері нақты әрі тиімді болуы тиіс. Өндірушілерге нарыққа шығуға, экспортқа жол ашуға көмектесуіміз қажет», – деді Олжас Бектенов.
Министрліктерге екі апта ішінде жаңа тәсілдерді әзірлеп, ұсыну тапсырылды. Мамандардың пікірінше, бұл шешім жеңіл өнеркәсіптің бәсекеге қабілеттілігін арттырып, жаңа жұмыс орындарын ашуға серпін береді.
