Ипотекалық несие бойынша жылдық тиімді мөлшерлеме 25%-ға дейін рұқсат етілді. Бұған дейін жоспарланған 20% шектеу алынып тасталды, деп хабарлайды Zhaiyqmedia ақпарат агенттігі.
Қаржы нарығын реттеу агенттігі мен Ұлттық банк бұл шешімді 2025 жылғы 1 қарашадан 2026 жылғы 1 шілдеге дейін күшінде қалдырмақ. Қаулы 26 желтоқсанда тіркелген.
Ресми мәліметке қарағанда, шектің жоғарылауы базалық мөлшерлеменің 18% деңгейінде тұрақтап тұруымен байланысты. Мұндай жағдайда банктердің тиімді ипотека беруі қиынға соғып отыр.
«Егер мөлшерлеме 20% болып қалса, ипотекалық несиелеу мүлде тоқтап қалуы мүмкін еді», — деп мәлімдеді агенттік өкілдері.
Қазірдің өзінде кейбір қаржы ұйымдары ипотека ұсынуды төмендеткен. Сарапшылар шекті көтеру банк секторына уақытша дем беріп, нарықты сақтап қалудың амалы деп бағалап отыр.
