Өскеменде «Время истекло» азаматтық бастамасы қаладағы «Magnum» супермаркетін қайта тексеріп, сөрелерден жарамдылық мерзімі бір жылдан асып кеткен тауарларды анықтады. Аталған дүкен Жеңіс көшесі, 10 мекенжайында орналасқан.
Бұған дейінгі рейдтен кейін сауда орнының әкімшілігі заңбұзушылықтарды мойындап, жағдайды түзетуге уәде берген еді. Алайда бір ай өткен соң мәселе шешілмей, керісінше күшейгені байқалды. Белсенділердің мәліметінше, бұл жолы мерзімі өткен өнімдер қатарына ет өнімдері мен қышқыл-сүт тағамдары да қосылған.
Назар аударту үшін «Жаңа адамдар» қозғалысының өкілдері ерекше акция ұйымдастырды. Олар жарамдылық мерзімі өткен тауарларға толы үш бөшкені «Magnum мерзімі өткен тауарларды сатады» деген жазуы бар автокөлікке тиеп, қала көшелерін аралап шықты. Кейін химқорғау костюмдерін киіп, бөшкелерді дүкенге қайта әкеліп, ресми түрде тауарды қайтарды.
Акция барысында супермаркет директоры дүкенге келіп, сөрелердегі мерзімі өткен өнімдерді өз көзімен көрді. Ол ескі тауарларды утилизациялау жұмысына қатысып, мұндай жағдай енді қайталанбайтынын айтты.
«Мерзімі өткен тауар — бұл тек сапасыз өнім емес, бұл — мерзімі өткен сана. Егер өзгеріс керек десек, үнсіз қалмайық. Дүкендерде ескі өнім көрсеңіздер — суретке түсіріп, бізге жіберіңіздер. Бұл — үлкен өзгерістердің бастауы», — деді «Жаңа адамдар» қозғалысының өкілі Амина Аманбаева.
