Сурет: Қырғызстан ТЖМ
Қырғызстанның Төтенше жағдайлар министрлігі Ыстықкөл облысында сел жүрген кезде жоғалып кеткен мектеп оқушысын іздеуді жалғастырып жатыр, деп хабарлайды Zhaiyqmedia.kz ақпарат агенттігі.
Sputnik Қырғызстанның мәліметінше, 5 маусым күні кешкі сағат 20:00 шамасында нөсер жаңбырдан тау беткейі опырылып, сел ағындары Балықшы – Ананьево – Қаракөл автожолының бір бөлігін жауып қалған. Лай мен тас массасы Mercedes-Benz Sprinter және Ford Mondeo көліктерін, сондай-ақ екі адамды басып қалған. Сол күні сағат 23:35-те 18 жастағы жігіттің мәйіті табылды.
Іздеу жұмыстарына шамамен 200 құтқарушы, полицейлер, азаматтық қорғаныс мамандары және жергілікті тұрғындар ауысыммен қатысып жатыр.
«Сел ағыны салдарынан хабар-ошарсыз кеткен мектеп оқушысын іздеу жалғасып жатыр. Әзірге нәтиже жоқ, қосымша ақпарат кейінірек беріледі», — деп хабарлады Қырғыстанның ТЖ министрлігі.
