Сурет: Egemen Qazaqstan
Қазақстан американдық Remitly компаниясының Immigration Index 2026 халықаралық рейтингінде ТМД елдері арасында бірінші орынға ие болды, деп хабарлайды Zhaiyqmedia.kz ақпарат агенттігі.
82 мемлекетті қамтыған әлемдік рейтингте Қазақстан жалпы есеп бойынша 53-орынға жайғасып, зерттеуге енген өңірдегі барлық елдерден озып шықты. Посткеңестік кеңістіктегі басқа мемлекеттердің көрсеткіштері төмендегідей: Молдова – 56-орын, Әзербайжан – 66-орын, Армения – 74-орын, Өзбекстан – 75-орын. Ал Ресей, Беларусь, Қырғызстан, Тәжікстан және Украина бұл зерттеуге енгізілмеген.
Рейтинг авторлары елдерді 34 көрсеткіш бойынша бағалаған. Олар 16 санатқа біріктірілген. Олардың қатарында қауіпсіздік деңгейі, денсаулық сақтау мен білім сапасы, экология жағдайы, жұмыспен қамту мүмкіндіктері, өмір сүру құны, тұрғын үйдің қолжетімділігі, қоғамдық көлік дамуы, отбасыларды қолдау және мигранттардың ірі қауымдастықтарының болуы бар. Әлемдік рейтингте Швейцария көш бастап тұр.
Remitly сарапшылары рейтингті құрастыру кезінде тек экономикалық көрсеткіштер ғана емес, сонымен қатар өмір сапасы, қауіпсіздік, отбасылар үшін қолайлылық және мигранттардың ұзақ мерзімді бейімделу мүмкіндіктері де ескерілгенін атап өтті. Зерттеу қорытындысына сәйкес, қазіргі мигранттар үшін басты критерийлер өмір сапасы, қауіпсіздік, медициналық қызметке қолжетімділік және тұрақты болашақ құру мүмкіндігі. Осы факторлардың жиынтығы бойынша Қазақстан 2026 жылғы рейтингте ТМД елдері арасында ең үздік ел атанды.
