АҚШ президенті Дональд Трамп NBC News арнасына берген сұхбатында Гренландияны АҚШ-қа қосып алу талпынысына қарсылық танытқан Еуропа көшбасшыларын тағы да сынға алды. Ол Еуропа елдері бұл мәселеге араласпай, Украинадағы соғысқа назар аударуы керек екенін мәлімдеді, деп хабарлайды Zhaiyqmedia ақпарат агенттігі.
Трамптың сөзінше, Гренландия аралы АҚШ-тың ұлттық қауіпсіздігін қорғау үшін стратегиялық маңызға ие. Осыған байланысты ол еуропалық саясаткерлердің бұл бастамаға тосқауыл қоюын орынсыз деп санайды.
«Еуропа Ресейдің Украинамен соғысына назар аударуы керек, өйткені, шынын айтқанда, мұның бәрі неге әкеліп соққанын көріп отырсыздар. Еуропа Гренландияға емес, осыған бас қатыруы тиіс», – деді Трамп.
Сұхбат барысында журналист АҚШ президентінен «Гренландияны күшпен басып алуыңыз мүмкін бе?» деп сұрады. Бұл сауалға Дональд Трамп нақты жауап беруден бас тартып, «Түсініктеме бермеймін» деп қысқа қайырды.
Фото: Әлеуметтік желіден
